ԲԱՐԻ ԳԱԼՈՒՍՏ «ԱՐԱՐԱՏ» ԱՌՈՂՋԱՐԱՆ

Ջերմուկը Հայաստանի ամենագեղեցիկ վայրերից է: Բնությունը ոչինչ չի խնայել այս գողտրիկ առողջարանային քաղաքի համար. հանքային ջրի անսպառ աղբյուրներ, մեղմ կլիմա, հարուստ բուսականություն, մաքուր օդ, չափավոր խոնավություն, ջրվեժներ, լեռներ, ալպիական մարգագետիններ… Վայր, որ կարծես ի վերուստ ստեղծված է հանգստի ու բուժման համար:
Հայաստանի այս չքնաղ վայրը սիրել են հայ մեծ դասականներից շատերը` Վ.Սարոյանը, Ս.Խանզադյանը, Պ.Սևակը, Ս.Կապուտիկյանը, Մ.Շահինյանը և ուրիշներ: Հանգստյան օրերն անցկացնելով «Արարատ» առողջարանում` մարշալ Հ.Ք.Բաղրամյանը գրել է. «Ջերմուկը հիանալի վայր է, ոչ մի տեղ նման հիասքանչ վայր չես գտնի: Այս ամբողջ գեղեցկությունը բառերով նկարագրելու համար պետք է Րաֆֆի լինել… Կլիման այստեղ հոյակապ է, զանգեզուրյան լեռները վեհ են և ազդեցիկ…»: Իսկ Վ.Սարոյանը գրել է. «Իմ սիրած անկյունը Հայաստանում Ջերմուկն է: Այն գտնվում է մի հարթակի վրա, որը շրջապատված է հարուստ անտառածածկ ունեցող սարերով: Ջերմուկի վայրի գեղեցկությունն ու թարմությունը, նրա կանաչ ստվերի հետ միասին, Արարատյան դաշտի այրող արևից հետո ապահովում են մարդու լիակատար հանգիստը»: